閃電俠嘅速度加上雷神嘅身形，狼隊翼鋒艾達馬查奧爾當然就冇超級英雄咁犀利，但係大隻得嚟又跑得快嘅佢，到底係點樣操返嚟嘅呢？呢位西班牙前鋒日前就喺ig示範畀大家睇點樣做引體上升，要留意佢做嘅係加咗「重量」嘅引體上升，就係孭住佢嘅狼隊體能教練一齊做！查奧爾自己都72公斤重，仲要加埋一個正常男士嘅體重，不過都難唔到查奧爾。最癲嘅係，做緊平板支撐嘅查奧爾，只係用腹部核心肌群就可以將上半身「彈起」，真係勁到爆！