星期日西甲馬德里雙雄分途出擊，馬德里體育會主場鬥榜尾嘅伊巴。今場馬體會「大傷鋒」，射手蘇亞雷斯、祖奧菲歷斯等等齊齊缺陣，不過爭冠心切嘅佢哋有唔少球員挺身而出。42分鐘，馬體會就憑住一次角球攻勢，由安祖哥利亞（右）接應二傳門前撞入先開紀錄，兩分鐘後佢再接應恩歷克卡拉斯高傳中，轉身抽入助馬體會領先2:0。換邊後馬體會先有卡拉斯高攻入今季第四個聯賽入球，再有馬高斯洛蘭迪（左）梅開二度，最終以5:0大勝一場。
另一邊廂皇家馬德里作客基達菲，賓施馬都擺咗喺後備席，殘陣應戰下俾基達菲撳住嚟砌，主隊全場一共起咗19次腳，好彩皇馬有大勇門將泰拔高圖爾斯，左飛右撲之下成功力保不失，但皇馬自己亦都搵唔到入球，只能夠同基達菲互交白卷搶得一分。馬體會以70分續排榜首，皇馬就以3分之差排喺第2位。