拜仁慕尼黑上周六德甲作客3:2擊敗禾夫斯堡，奪標形勢大好，但教練費歷克賽後受訪時就話想喺季後離隊，德國傳媒指費歷克希望接替路維執教德國國家隊，拜仁就視RB萊比錫少帥尼高斯曼為接任人選。費歷克賽後話：「我希望喺今夏結束我嘅合約，呢個係一個事實，我今日已經同球隊講咗我嘅諗法，喺對巴黎聖日耳門一戰後，我已經希望喺季尾結束我嘅合約。」有指佢將極大機會喺歐國盃後，接替路維成為德國新帥。費歷克表示：「對於我嘅未來，暫時完全冇定論，我未有就呢個話題進行過對話。當然，德國主帥係個唔錯嘅選擇，每位教練都希望得到，過去幾個星期對我嚟講真係唔輕鬆。」56歲嘅費歷克上季原本係尼高高華助教，聖誕前暫代教練一職後坐正，仲成功帶領球隊成為史上第2支單年度「6冠王」球隊。不過，費歷克同球隊體育總監沙歷咸美錫因為建隊方針唔同屢傳不和，加上球隊衞冕歐聯失敗，令兩人關係陷入冰點。有傳拜仁視萊比錫主帥尼高斯曼為接任人選，不過拜仁會方喺周日發聲明，指唔認同費歷克單方面披露佢嘅個人想法，將會同後者傾吓。