歌手譚杏藍（小花）疫下不時貼做運動相派福利，昨日她在Ig貼出留院照片，自爆因呼吸困難入院：「折騰咗一晚，感謝大家關心，放心，我唔係肺炎。前幾日由普通感冒，一夜之間變成呼吸困難，有種前所未有奇怪感覺。以為好似平時哮喘，點知連吸藥都吸唔到落肺。」
小花原定昨日拍MV也要改期，她說：「本來想捱到拍埋MV先至熄機，但身體好似話我知，譚杏藍麻煩你休息。好多晚因為呼吸困難瞓唔到，噚晚入咗醫院，呢一覺係我成個月瞓得最好嘅一次，終於搵返盡力呼吸嘅感覺。今次經驗教訓，凡事唔好去到咁盡，照顧好身體先至可以繼續行落去。」她大呻每年4月都特別黑仔，容易生病，林奕匡和鄧洢玲都留言慰問。