我想問菲臘親王打了疫苗未，如果未，唔可以同枱食飯，伊利莎白會好空虛。之不過，同枱異夢，十個人一圍冇偈傾嘅話，好難完善氣氛。
親王見我粒聲唔出，問係咪擔心投白票會犯法。我話冇打算投白票，「我有心水議員，除了許智峯羅冠聰他們人不在港，咁我可以投畀袁嘉蔚楊雪盈徐子見鄭達鴻梁晃維，超區我投岑敖暉。」親王的禿鷹目光瞪過來，我倒抽一口涼氣怯了，承認「我係大貪，幻想學吳揪北一個人能夠去盡選45人，但我齋得一票，唯有掙扎諗吓點投才會win。可能問吓樓下那個賭仔看更。」親王摸住皺成一團的面頰，叮囑我萬事唯忍，注意言行，不投實拉。我驚訝他的廣東話道地過綠茶，北投梗係溫泉。他說：提議浸台灣溫泉好有可能告你煽動，穿白衫聽拉，黑衫=黑暴，安全計匿喺屋企。由得政府公佈430萬選民全部投票，預咗佢打咗針嘟安心碼當兩票呢個殺手鐧。想核查與點票嗎？傳媒冇呢個特權喎，以前得，今後會坐監㗎。而科興得50.7%有效，12月投票時50%急降至單位數，香港人要溝針才能出街放狗。親王無奈話：鬼叫你哋咁鍾意做香港人。黎明轉醒前，愛丁堡公爵做出心心拜拜，踏上畢業的海軍遠艦船，回首揮一揮衣袖，叫我關照手足，睇餸食飯。