全國政協副主席董建華早排去北京開兩會時候，行行吓喺主席台上面跌倒，要其他人扶起身，但老董事後話只係掛住同人打招乎，唔小心絆倒一下，聲稱自己「一切安好，請大家放心」，不過佢噚日參加全民國家安全教育日開幕典禮，除咗步履蹣跚，仲要人扶先行到落台，同「一切安好」有啲落差喎！
全民國家安全教育日開幕典禮噚日喺會展舉行，除咗老董，仲有中聯辦主任駱惠寧、維護國家安全公署署長鄭雁雄同特首林鄭月娥出席，老董入場時候雖然冇用枴杖，但睇得出佢步履蹣跚入場，而進場期間，仲要林鄭多次放慢腳步，以免同老董拉開太大距離，明顯怕老董又仆倒，要睇實佢。
到開幕典禮啟動儀式同大合照環節，嘉賓全部要上落台，呢個時候老董要身旁嘅人攙扶行，當中兩次行落台嘅時候，國安公署署長鄭雁雄、政務司長張建宗同財政司長陳茂波醒目，主動行上前扶住老董，而董離開時候被問到身體狀況，佢冇答就走咗，不睇老董行成咁，上次仆親應該唔係佢所講「一切安好」。
李八方