北京對香港狠下殺手，又強推國安法又閹割選舉，要睇通中共呢個專制政權，冇咁上下功力真係隨時錯誤解讀，所以八方就見本報同事不時搵夫子劉銳紹請教。佢係一個時事評論員，但原來另一身份係作家，八方最近喺書店見到夫子出咗新作《萬獸寓言》。
政治小說《動物農莊》成為康文署上年十大借閱書籍三甲之一，原來《萬獸寓言》都好好賣，夫子話知道本書喺唔少書店都大受歡迎。咁本書講乜？夫子寫咗54篇小故事，用動物獸性比喻政局嘅險惡，當中穿插佢對當下時勢嘅觀察，有狂呼「殺無赦」嘅惡獅、個殼貼住「我真係好鍾意屋企」標貼嘅蝸牛、被人抬起「好打得」嘅馬等。
夫子同八方講，本書分咗做「黑色寓言」、「紅色寓言」同「灰色寓言」三部份，最前者係諷刺時弊，仲預示唔少政治爭論，就算畫公仔冇畫出腸，大家都應該好有共鳴睇得過癮；至於「紅色寓言」，夫子就話自己寫得最落力，因為希望寫畀後生仔睇，明白「生存就係勝利」嘅道理。至於「灰色寓言」？八方就幫夫子賣關子，等大家自行發掘。
李八方