有時睇建制派嘅言行，真係覺得田飛龍冇講錯。好似忠誠紅人李梓敬噚日走去日本領事館請願，照稿讀都算，連抗議日倒「核廢水」講成「佛系水」，真係建制派都冇得幫佢兜。
日本政府日前宣佈，2023年起將福島第一核電站的低輻射水排入大海，中國梗第一時間抗議，公民力量亦唔執輸，由主席潘國山、李梓敬等帶隊去日本領事館請願，不過李梓敬發言時不單止只識照稿讀，仲要將「核廢水」讀錯成「佛系水」、將「決定」讀成「決電」，真係認真失禮。
咁都未算，之後佢哋等候向領事館職員遞交請願信期間，有成員「提醒」佢，可以趁呢個時候叫下口號，點知李梓敬問其他人，佢哋有冇咩口號叫？連請願有咩口號叫，都要問人，究竟李梓敬知唔知為乜請願？呢個時候有人指住手上示威牌，示意佢跟住標語讀，佢先一邊睇住一邊叫：「要求日方撤回決定，盡快與周邊國家協商」。其實整個請願行大約10分鐘，李梓敬都甩甩漏漏，又難怪田飛龍話建制派入面多「忠誠廢物」。
李八方