西布朗季中請咗護級專家艾拿迪斯上任，上場大炒車路士5:2之後佢哋又再見到護級一線曙光。星期一佢哋迎戰中下游嘅修咸頓，開賽四分鐘已經有麥巴耶戴亞尼將個波頂咗入網，不過就俾旁證話佢越位在先。VAR翻睇嘅時候雖然確認戴亞尼企嘅位冇越位，但就劃唔到實線睇佢上半身有冇越位，最終就冇推翻到越位判決，艾拿迪斯賽後亦都直指呢次判決出錯。好彩之後西布朗憑住馬圖斯佩雷拉射入12碼，加上馬菲菲臘斯同哥林羅賓遜嘅入波，加上門將森莊士東末段撲出12碼而淨勝對手3:0，取得聯賽兩連勝之後，西布朗距離護級又行近咗一步。
同日愛華頓作客白禮頓，領隊安察洛堤迎嚟第50場英超執教賽事，但兩隊屢屢失機之下只能夠互交白卷，5場不勝嘅愛華頓離前4越嚟越遠。