海關出招，師奶朋友急問，顧客拎住的麻辣鴨血冰豆腐與救世口罩，喺邊間阿布泰買到？我懶醒答佢，近近地去康怡。她說冇。咁金鐘啦。她人在金鐘蛇餅陣中，冇喎。我發揮幫緊你精神，上網睇應該係淘大阿布泰有賣。海關趁泰國新年，在人家喜氣洋洋頭上潑穢水，時間夾到咁正顯然有景轟。借力打力直接幫阿布泰大肆宣傳，海關「手足」促銷吹雞，懲罰的蛇餅，各區高調配合，海關今次做嘢，唔使阿蛇教。
另一邊廂，林鄭「壽終正寢」一諾千金，完善她的管治新常態，沙嶺殯葬城暫緩？冇可能，over her dead body！送中唔成，這兩年死得人多的香港能善終的機會，就快毀於民x聯忠誠廢物手上。曾經被建制往死穴裏打，林鄭今次借墓穴大反擊，亡靈召喚師上身，向唔見棺材唔流眼淚的賤種議員訓示：他朝大體也相同，唔係個個都是何姓議員，可以厚顏霸佔官地殮葬父母咁筍！林鄭為連任搭好奈何橋，等牛鬼蛇神在殯葬城呢鋪叉錯腳，自損陽氣，踏上不歸路。上帝感召的林鄭，不信邪不皈佛，由臉到腳全黑，親往建制廢柴墳前行禮如儀，潑水撒花。莎娃迪卡。