國際米蘭周日喺主場以1:0小勝卡利亞里，喺意甲11連勝後，以30戰得74分高踞榜首，拋離排第2嘅同市宿敵AC米蘭11分，喺剩番八輪賽事嘅情況下，今季嘅聯賽錦標似乎幾穩陣。國際上半場攻勢唔多，一直等到77分鐘，先至由達美安喺尾柱接應阿舒拉夫右路地波傳中，近門撞入全場唯一入球小勝。
紅黑軍團方面，佢哋上周六作客帕爾馬，上半場已經贏緊2:0，點知伊巴謙莫域踢到59分鐘，就因為疑似衰多口侮辱球證，直接食咗張紅牌出場。不過米蘭最終仍然以3:1贏波。米蘭教練皮奧利賽後話，佢已經同伊巴了解過發生乜事，強調呢位瑞典前鋒並冇冒犯球證。意大利傳媒推測，可能係伊巴用意大利文埋怨判決「奇怪」（strano）嘅時候，球證聽錯咗佢話「混蛋」（bastardo），所以先一時火遮眼趕佢出場。米蘭暫時都未講會唔會幫伊巴上訴，但球會總監馬甸尼透露，好快就會同佢續多1年約到2022年。