歐倩怡誕下一子一女後便做全職媽媽，不過她花十年時間完成兩個大學學士課程，包括市場管理學和食物及營養學， 最近又再報讀體育及運動營養學碩士及社區營養深造證書，問是否想給小朋友一個好榜樣？歐倩怡肉緊地握實拳頭笑說：「大仔反而問我讀咁多書嚟做乜，你仲未讀完？點解你讀咁耐都未讀完，你幾時出嚟做嘢呀？幾時賺錢呀？如果佢哋見到有玩具想買，我就話『冇返工，我冇錢，我啲錢係要留返買嘢食嘅』，佢哋知道阿媽冇錢，哈哈哈。」
兩個小朋友就讀國際學校，歐倩怡教導子女方法開放自由，從不打鬧。不過，提到早前被質疑會考僅得五分，狂花老公錢兼買學位，她心平氣和說：「以前細個掛住游水同唱合唱團，英文基礎打得唔好，初初讀營養學高級文憑係吃力嘅。誤打誤撞又信咗洪永城，佢話市場管理有用，花咗四年時間，後來又去城大讀咗大半年心理學，但發現自己冇嗰種天份同熱誠，最後又返去讀營養學，唔經唔覺咁多年。」