前𡃁模馮鎵瀠（Naomi）的好友麥貝夷暗寸前度「性伴侶數量多得驚人」，Naomi昨日透過電話回覆《蘋果》時，暗寸翟威廉身有屎。本報昨日收到兩張報料相，是上月1日麥貝夷35歲生日，在翟威廉佐敦的酒舖開P的照片，Naomi亦是坐上客，她力證當日翟威廉在場，並說︰「總之我見到翟威廉喺度，佢哋冇特別介紹，但如果唔熟，點會成個場借畀人搞生日。」
Naomi更狠插翟威廉：「因為麥貝夷關係見過佢幾次，希望佢唔係『張致恒2.0』。」她更指：「想為麥貝夷講幾句公道說話，如果佢唔係身有屎，都唔使周圍搵朋友叫麥貝夷幫佢澄清，佢冇做錯嘢傷害過女仔，人哋都唔會喺WhatsApp度block佢！」