黃文慧日前擔任楊盼盼主持的節目《盼你賞面》嘉賓，自言60年代入行比較坎坷，與公司簽約未夠一年，便遇上香港暴動，惟有跟隨另一劇團到星馬泰登台數月，再回港到電視台面試，終成為電視台演員。雖然多演綠葉，但性格樂天的她未有灰心。
黃文慧在電影《嚦咕嚦咕新年財》飾演劉德華的媽媽，角色患有腦退化症，她說：「有一個鏡頭，我要由三番開始數、講對白，三番幾多錢、四番幾多錢，拍呢個鏡頭等到天光先拍，當時好疲勞又緊張，完全記唔到對白，take咗50次都唔得。劉德華好錫我，揸住張紙喺鏡頭後面提我，不過我都係讀唔掂。最後導演close up淨係拍我個口，我可以揸住張紙嚟讀。」