中央出手封殺香港異見聲音，另一方面又想有人做忠誠反對派，點知民主陣營冇咩人中計，於是家陣變成好似得班建制派自己玩咁，當搵唔到敵人，呢班忠誠的廢物只好開始鬼打鬼。
最新混戰由建制最大黨「禮義廉」上演內鬥戲碼，近年成日批鬥司法界同法律界嘅「假博士」葛珮帆，喺報紙發表膠見，矛頭直指香港大律師公會，扣晒帽子話大律師公會「屢為反中亂港者吶喊助威，挑戰『一國兩制』憲制權力」，然後仲「獻計」，認為保留「大律師」毫無必要，話分律師同大律師嘅制度不合時宜。
點知呢番說話撻着咗葛「假博士」個黨友，身為大律師嘅香港法學交流基金會主席馬恩國，即刻透過傳媒反擊，話葛珮帆法律學位都未讀過，又未執業過，叫「葛博士」管好IT界先啦！司法嘅嘢唔關佢事，馬恩國仲話大律師變咗律師，一樣會係黃絲反政府，而自己只係講道理，唔係政治歸邊。乜你家陣先知講道理原來重要？香港市民夠多反政府啦，咁係咪踢晒佢哋落海？
李八方