上年疫情大爆發令航空業蕭條，不少飛機「曬太陽」，國泰（293）要四出撲水，大部份員工都要變相減薪11.5%。
高層雖然帶頭減薪兩至三成，不過計埋其他福利，有董事實際上減得少過員工。
國泰公佈2020年年報，顯示董事整體底薪的確減少15.6%，總共支出1,710萬元，但實際上仲有花紅、津貼、退休計劃供款、房屋福利等等，減幅冇想像中咁多。
眾多高層之中，營運及航空服務總裁韓兆傑就係全集團獲最好待遇嘅一位，減幅竟然唔夠一成，年收1,030萬元。剛剛轉去母企太古做CFO嘅馬天偉就排第二，都有908萬薪酬，2019年臨危受命嘅CEO鄧健榮就排第三，有成813萬。
頭五大高層整體薪酬減11.9%，尚算同員工睇齊，但華華覺得呢班高層咁樣共渡時艱，未免輕易咗少少喎。
李華華