馬德里體育會季中曾經喺積分榜拋離過對手，但近兩個月戰績就下滑得好緊要，星期日佢哋作客前列分子西維爾又再遭遇滑鐵盧。開波只係八分鐘，西維爾就輸咗球12碼，但係奧比歷神勇救出奧甘波斯操刀嘅12碼，馬體會先可以力保不失。但可惜大難不失就冇後福，70分鐘西維爾老將捷西斯拿華斯殺入禁喺右路底線傳中，結果馬體會嘅後防走漏晒馬高斯阿古拿俾佢輕鬆頂入。之後馬體會有幾次好好嘅機會都把握唔到，就係咁以0:1落敗。賽後雖然佢哋仍然排喺榜首，但就只係領先皇家馬德里三分。
同日西甲卡迪斯對華倫西亞就出現咗不愉快事件喎，29分鐘雙方當時踢成1:1，卡迪斯後衞祖安卡拉同華倫守將迪亞卡拜就發生衝突，迪亞卡拜同球證交涉之後同隊友拉隊離場，短暫停頓之後除咗迪亞卡拜之外嘅球員都返咗球場。賽後華倫就話原來迪亞卡拜係受到卡拉種族歧視所以走人，華倫嘅隊長荷西加耶就話：「迪亞卡拜同我哋講佢俾人種族歧視，佢冇心機繼續踢，但有人同我哋講如果我哋唔繼續比賽分分鐘會俾人扣分，我哋先出返嚟球場。」最終華倫西亞以1:2落敗。