換咗台長後一直被抽調節目嘅香港電台，最近連逢周日播出嘅英文節目《給香港的信》都被波及，噚日嘅嘉賓原本係屯門區議員巫堃泰，但上個星期突然換人，由港台顧問委員會前主席、「梁粉」陳建強上陣。
結果播出嘅節目中，陳建強唱好北京改動選舉制度，認為可以保障國家主權同香港長遠繁榮穩定，又呼籲香港年輕專業人士把握內地發展機遇，至少肯定有廣播處長李百全會讚好。
其實港台未有交代點解突然要換嘉賓，但巫堃泰早前就喺facebook透露，指佢本來想喺呢一集內容，向一位因公務經常探訪嘅羈留人士講句「復活節快樂」，但錄音後嘅第二日就有編輯同佢講，按照港台嘅新編採標準，佢呢封「給香港的信」被視為有爭議，要通過檢定先可播放。巫堃泰話對此冇乜太大感覺，會尊重編輯自主，而佢之後亦將呢封寄唔出嘅「給香港的信」內容，貼喺佢facebook到，即使港台唔用都有機會畀市民睇到。
李八方