上季嘅西班牙盃決賽因疫情一延再延，直到上禮拜六先上演，同今季決賽只係相距兩周，更破天荒兩場都有畢爾包參戰，有機會創造一個月內「衞冕」嘅神話。兩支巴斯克地區球隊同樣超過30年未贏過西盃，今仗喺大雨之下大戰，亦未能發揮出正常水平，雙方上半場互交白卷。但下半場戰至63分鐘就出現轉捩點，皇蘇前鋒樸圖接應隊友斜直線入楔，禁區內俾畢爾包中堅恩尼高馬天尼斯踢跌，球證原本出示紅牌直接將後者趕出場，但翻睇慢鏡後決定改罰黃牌，但照判罰12碼。奧耶沙巴爾操刀，畢爾包嘅門將烏尼西蒙捉錯路，助皇蘇先開紀錄之餘，球隊亦靠此記全場唯一中框射門，以1:0氣走畢爾包，事隔34年後再度捧起西盃（圖）。至於畢爾包將會喺17號喺今季西盃硬撼巴塞隆拿，再爭冠軍。