多蒙特前鋒艾寧夏蘭特係現今球壇嘅當紅炸子雞，各豪門球會都想得到佢。禮拜四佢老豆賀蘭特同經理人拉奧拿就飛抵西班牙巴塞隆拿，據報係同巴塞隆拿商討夏蘭特嘅轉會事宜，之後又再轉飛馬德里同皇家馬德里嘅代表會面。有傳賀蘭特同拉奧拿已經同咗巴塞新任會長拉撲達見面，巴塞方面承諾會畀夏蘭特攞僅次美斯嘅全隊第二高薪；至於皇馬方面，據報就準備好今夏出手，並提供五年嘅大合約。但其實報道話個行程仲未完，仲要飛去倫敦仲同英超豪門，包括曼聯、曼城、車路士，同利物浦等嘅代表會面。不過禮拜五多蒙特就出咗嚟澄清，體育總監索歷仲實牙實齒咁話今夏絕對唔會賣走夏蘭特，又話已經將球會取態話咗畀拉奧拿知。唔知夏蘭特最尾會花落誰家呢？
