現年23歲的鄧月平（Larine）入行五年，早前跟舊公司約滿後，膽粗粗投資六位數字自組公司。她日前接受《蘋果》訪問，指原來與其命格有關，她說：「楊師傅（楊天命）話我天生女將軍命，要靠自己去拼搏，應咗啦！」她的團隊有三位經理人，都有份投資。自組公司好處是有主導權，最近Larine推出新歌《U》，除了揼本製作，她亦參與作詞：「我有好多諗法，想唱返自己有feel嘅嘢。」
前年Larine參演陳果導演的電影《墮胎師》，為配合角色一日食足七餐，增肥至143磅，她說：「接咗部戲，最擔心係肥唔到，之前上優先場口碑唔錯，有人讚好開心。」談到感情，她自言仍是單身，坦言早幾年好恨拍拖，「之前自己年紀細，好想同人傾訴，嗰時好無助，好想靠愛情去support自己。」但她自認有「戀愛腦」：「一拍拖就冇咗個腦，只係掛住男朋友，咁落去係唔掂。」剛入行時，她曾被傳媒拍到與大她12年的香港前拳王杜恒霖拍拖，當提起杜生時，Larine卻煞有介事說︰「邊個杜生呀？」
場地提供︰土生花