法國傳媒報道,巴黎聖日耳門(PSG)前鋒基利安麥巴比已經決定咗唔會參加今夏嘅東京奧運,並會利用休季時間考慮自己嘅前途。報道話麥巴比已經通知咗法國足總,但佢會踢埋6月揭幕嘅歐國盃決賽周。麥巴比同PSG得番一年合約,有指皇家馬德里同利物浦都好想將佢收歸旗下。而PSG為咗留住呢位22歲射手,已經準備將佢嘅年薪加至3,000萬歐元(約2.7億港元)。
至於PSG嘅歐聯八強對手拜仁慕尼黑喺禮拜二就宣佈,喺上個禮拜世盃外代表波蘭嗰陣,因膝傷退下火線嘅前鋒羅拔利雲度夫斯基,經詳細檢查後證實需要養傷四星期,代表呢位32歲前鋒將會缺席4月對PSG嘅兩合回嘅賽事。