自從有北京加持之後，特首林鄭月娥家陣自信返晒嚟，亦知公開發言唔係講畀香港人聽，而為向北京表忠，所以有恃無恐，即使亂噏當秘笈都唔理，好似噚日上晝回應記者問政府收緊公司查冊安排時，拋出一句「睇唔到記者點解有特權」，然後講閹割香港選舉，就話國際公約無要求一人一票或票值相等，但八方搵吓資料，發現777呢兩句嘢都同事實有出入，今次佢似乎又係亂噏當秘笈。
八方先講「睇唔到記者點解有特權」呢句，政府話收緊公司查冊係保障私隱，但偏偏私隱條例入面，就特別寫明新聞活動可獲豁免，仲未計有多條香港法例，入面都有就記者工作特別處理，甚至條文寫明叫「特權」呀。
至於國際公約有冇要求一人一票問題，其實777硬銷政改時已經畀人摑過好多巴，睇番聯合國人權事務委員會早喺1996年發表嘅文件，編號「CCPR/C/21/Rev.1/Add .7」裏面嘅第21段，咪清楚寫咗「... 必須執行一人一票的原則」同「投票人所投下的票應一律平等」，想詐唔知呃香港人，有啲水平好喎！
李八方