RubberBand將於下月3至6日假紅館舉行音樂會「RubberBand Ciao 2021」，今次音樂會加入了雷柏熹爵士大樂團（Patrick Lui Jazz Orchestra），及無伴奏組合AMuiXis一同演出。日前首次同場綵排後，RB四位成員都表示十分興奮。
阿正說：「聽到big band玩返我哋嘅歌，當中有新編曲都幾感動。」阿偉看到多人聚在一起，不禁說：「加埋都幾十人，排練室已經好大，但都有逼嘅感覺，好開心。」泥鯭指大會防疫工夫做到足：「我哋好乖做晒檢測，好安全先一齊練歌，同埋排練時樂手都間開晒，又唔畀外人探訪。」RB又特別創作新歌《Ciao》，描述香港人近幾年的心情，但因為忙於綵排，未能趕及開騷前灌錄，6號指：「我哋會先拍片段，早啲畀大家聽吓隻歌，做完騷再錄歌。」