林卓廷fb專頁小編，不時會喺專頁分享阿廷獄中情況，但其實fb之外，阿廷仲有個Youtube channel叫Table TV，以往晚晚都喺Youtube live同粉絲見面，但𠵱家佢被扣押，無得同大家傾偈之餘，阿廷fb專頁小編仲話阿廷好唔慣，同埋佢好抱歉可能短時間內都陪唔到大家，為咗唔想個台就咁停止運作，阿廷嘅團隊諗計將個台再次激活，頭炮仲有佢囝囝登場。
阿廷fb專頁小編話，阿廷一路都有拜託小編等人諗下拍乜畀大家睇，雖然曾經有fans話播佢屋企缸魚游嚟游去都會睇，變阿廷版魚樂無窮，但小編就覺得唔可以咁求其，所以整咗一條10分鐘嘅片，回顧阿廷呢幾年內做過嘅嘢，同時邀請咗阿廷個仔為佢哋朗讀阿廷嘅第一封獄中書簡，仲預告下禮拜首播。
除咗搞返個台，小編又引述以往阿廷教佢哋，就算幾忙都好都一定要定期擺街站，因為呢個係直接接觸到市民，同大家溝通，所以佢哋打算嚟緊復活節假，喺香港各旺點擺街站同大家打招呼，順便喺街頭收集大家寫畀阿廷及佢屋企人嘅信件及心意，至於開站點同時間就遲啲再公佈。
李八方