中國版transfermarkt管理員朱藝周一喺微博爆料，指家陣效力緊中超球隊深圳FC嘅港將戴偉浚已經進行咗「會籍轉換」，並且通過直屬部門認證。簡單嚟講原本屬於香港足總嘅戴偉浚，已經正式申請「轉會」到中國足協，外界估計佢係為入選中國國青隊同國足鋪路，做個真正嘅中國人。
其實戴偉浚近年長駐中國，過去已經多次傳出過佢將會「回歸」中國國籍，佢本人亦都透露過希望為國足披甲，今次消息如果屬實的話都算係求仁得仁。現年21歲嘅戴偉浚上季為深圳上陣17次，射入1球同交出3次助攻，據內地傳媒透露深圳早前已經同佢簽咗為期三年，年薪130萬人民幣嘅合約。