新民黨李梓敬日前聯同公民力量成員到H&M辦事處抗議，唔滿意H&M拒用新疆棉花，但就畀人發現同行嘅公民力量主席潘國山竟然着住杯葛新疆棉花嘅Nike運動鞋。八方原本以為潘國山衰咗，建制派應該學精啲，點知藍絲、左派真係唔識吸取教訓，繼續口講抗議抵制新疆棉花嘅外國品牌，身體繼續着住口中話要抵制嘅adidas同Nike。
藍絲團體「香港同心會」噚日下午帶住有十幾人到H&M尖沙嘴廣東道分店外面展示標語，又高叫「新疆棉花頂呱呱」，抗議H&M集團抵制新疆棉花的聲明，雖然個個戴上印有五星紅旗口罩，但仍然有人着住被小粉紅杯葛同抵制、講明唔用新疆棉花嘅adidas同Nike品牌產品。
不過在場人士蠢唔晒，可能見記者望住佢哋身上嘅adidas同Nike商標，於是有人將同心會的貼紙貼在帽子的商標上，疑似想以此掩蓋帽子上的adidas商標。但更搞笑係，有一名抗議人士，穿上白底黃字，疑似抄襲被抵制品牌之一New Balance，山寨品牌新百倫（New Bailun LP）嘅鞋，呢個人就叻，就算即場除對鞋出嚟燒都唔肉赤，反正隨時上淘寶用一百幾十可以買過一對新鞋。
李八方
