近排有唔少打完武肺疫苗後不適甚至死亡個案，雖然政府專家話肯定唔關疫苗事，但市民觀感係點，唔使講明！本報收到讀者報料，話見到保安局長李家超噚日一早現身伊利沙伯醫院，佢前頸疑似出現紅疹，由於李家超周一先同林鄭等人打咗第二劑科興，難免令人猜測係咪有關。
八方翻查李家超資料相，發現佢上月22日接種第一劑科興時，頸部近衣領位置已有紅印，到本周一打第二劑，同一位置都有紅印，前日出席立法會時，頸部紅印更明顯。
八方向保安局查詢，局方承認李家超到過伊院作一般例行覆診，但冇講因乜求診，只係話局長健康狀況良好，又話李打完第二劑疫苗後「完全沒有任何不良反應或不適」，仲每日如常工作，連假都冇請！而局長早排搵私家醫生進行頸部扁平疣皮膚手術，皮膚見紅係手術後過渡期反應，同噚日到伊院例行覆診無關。
李八方