還柙近200日嘅快必，前日透過fb專頁嘅還柙日誌，講到喺荔枝角收押所每日有工開，負責貼信封，仲啱啱出咗$43.02糧，但被扣起四個幾供強積金。鬼馬嘅快必即時諗出餘下問題，包括明明未填過供款表格，更加想知如果呢個「供款額」，有冇得揀投資組合先？
睇返強積金政策，其實設有最低入息要求，如果人工唔過水平唔需要供款，現時係月入7,100蚊，在囚人士冇可能搵到咁多錢，咁點解要供MPF？呢件事引嚟關注囚權嘅張超雄注意，咁啱噚日佢聯同民陣召集人陳皓桓去探快必，大家傾開呢個問題，仲同快必分析，認為肯定唔關MPF事，因為出面月入幾千蚊都唔使供款，快必聽完都覺得有理。咁點解畀人扣糧？佢就要再了解，八方只希望最終答案，唔會係懲教部門無理剝削啦。
李八方