恒指失守1月及3月雙底支持後，跌勢明顯加劇，一來全城都係望住呢個位做人，見勢色唔對就沽貨走鬼，二來圖表顯示，下一站支持位乃去年底橫行區頂部27000點，空檔既廣且闊，撈底客唔願意咁快出手，導致承托力不足，結果就是由頭隊到尾。
港股弱不禁風，不過有個派系逆市動作頻頻，講緊嘅就係長和系。最新鮮滾熱辣嘅，當然係長實（1113）透過印股票方式，向李嘉誠基金會購入公用資產，集團再進行股份回購，最終李氏父子持股由約36%增至45%。短期股價料將受制51元，但由於有回購offer，低位料有買盤吸納賺取差價。我選擇利用期權做Short Put，4月份47元，博結算時守住此水平，期權金袋袋平安，希望如意算盤可以打響。
另一隻股份係和電香港（215），昨日早市專欄已提出，在此簡單講幾句︰最新業績提到，在支付5G資本開支及評估潛在投資機會後，將在中期業績對盈餘現金作出決定，屆時將會考慮派發特別股息。由於要等幾個月，要考耐性及持貨能力，缺少是但一樣嘅，勸你咪跟機。最後一隻係盈大地產（432），今日供股貨出籠，一係博炒上供股價0.82元，一係等企穩0.82元才加入戰圈，悉隨尊便。
唐牛