碧咸做美職聯國際邁阿密班主超揼本，簽入大牌一個又一個，之前簽咗前史篤城中堅梳爾哥斯，又搵嚟老友菲臘尼維利教波。禮拜二再宣佈成功同前阿仙奴後衞、家吓踢緊西布朗嘅基蘭基比斯（圖）簽約，呢位31歲後衞將會喺今夏免費加盟。基比斯話：「我好開心今夏可以去到國際邁阿密去展開我職業生涯嘅新一章，我好期待喺南佛羅里達擁抱新文化同新挑戰。」現年31歲嘅基比斯係阿仙奴青訓系統出身，曾贏過三次英足盃冠軍，今季淨係為西布朗喺英超上陣過10場，目前球隊深陷降班漩渦，加上幾乎有一半球員喺今夏合約到期，相信西布朗真係降班嘅話，就會面臨星散。