家吓正喺威爾斯國家隊備戰世盃外嘅翼鋒加里夫巴利，今季由皇馬外借到熱刺，近排表現仲「弗」到漏，不過呢位31歲威爾斯隊長喺新聞發佈會上就話，自己計劃喺球季完咗之後返番皇馬，完成同「銀河艦隊」之間周薪高達650萬歐元（約6,000萬港元）嘅合約：「我認為我今年嚟熱刺嘅主要原因係可以喺呢度踢到波，然後用好啲嘅狀態參加歐國盃。最初嘅計劃係喺熱刺踢一季，歐國盃之後我同皇馬仲有一年合約，所以我嘅計劃係返番皇馬，呢個一直係我嘅計劃。」有傳皇馬一直想收購多蒙特前鋒艾寧夏蘭特，但如果買唔到就會諗辦法邀基斯坦奴朗拿度（C朗）回巢，話唔定當日最強「BBC組合」又會重聚。至於近期戰績麻麻、之前仲喺歐霸盃意外出局嘅熱刺，巴利就認為國際賽期嚟得啱啱好：「我一直認為，當球會嘅事情發展得並唔順利嗰陣，最好就係離開一段時間，咁會對我有幫助。家吓我哋要做嘅就係將注意力集中喺威爾斯嘅比賽上面，忘記球會嘅生活。」