囚權組織石牆花前日喺fb召喚M&M師，因廠商將舊款40克裝M&M’s朱古力改做37克款，但懲教署冇更新名單，呼籲市民幫手，熱心市民將成千包合規格嘅M&M’s捐畀石牆花，幾乎打爆倉。
好多市民噚日帶住M&M’s朱古力去石牆花辦事處捐贈，石牆花喺fb話，朱古力係在囚人士僅有選擇，亦係家人心意，所以好重要。網民留言鬧懲教留難家屬，亦有網民去信M&M’s想佢哋同懲教署講包裝改咗。
石牆花創辦人邵家臻同八方講，感謝有心市民，證明港人未放棄。佢話朱古力用量大，估計大概有三周用量，目標係有一個月存貨，所以希望熱心人繼續捐贈。
生產商瑪氏香港噚日回覆話已同懲教署接洽，仲提供產品資料和照片以便更新。懲教署話知道市場同時有兩款M&M’s朱古力，會按機制有序調整。
李八方