中美洲國家伯利茲嘅國家隊（圖）禮拜一抵達海地備戰世界盃外圍賽期間，所乘坐嘅巴士俾武裝分子挾持，好彩隨行嘅海地警察經過談判後，一行人平安無事獲得放行。伯利茲原定喺禮拜四嘅世盃外作客海地，球隊喺禮拜一抵達當地備戰，不過佢哋坐旅遊巴士返酒店途中，俾一班手持步槍嘅武裝分子截停嚟搶劫。好彩車上面有四名警察負責護送，最後都成功說服班武裝分子，平安到達酒店。伯利茲隊長迪安麥古尼事後就話：「嗰陣真係好驚，好彩最後大家都冇事。」伯利茲足總亦都發咗聲明，譴責武裝分子嘅行為，又將事件通報國際足協，暫時未知禮拜四嘅賽事會唔會受到影響。