喺以前嘅車路士比賽中，鏡頭經常都會捕捉到車路士班主阿巴莫域治，坐喺史丹福橋球場看台上面睇波。不過原來呢位向來低調嘅油王對上一次接受專訪，已經要數到2006年。最近阿巴莫域治就接受咗《福布斯》嘅訪問，大談佢對車路士嘅期望，仲講起球隊成日換領隊嘅事。
阿巴莫域治話自己對球隊嘅期望17年嚟都冇變過：「無論以前抑或家陣，我嘅想法同球會所有人努力嘅目的都係一樣，就係贏冠軍，我認為獎盃係決定一家球會成唔成功嘅證明。車路士係一間擁有深厚歷史嘅球會，我嚟之前佢已經存在，就算當我第日離開時後佢仍然會繼續存在。我嘅任務係確保車仔可以獲得成功，同埋為球隊未來鋪路，呢樣亦都係我着重球隊青訓工作嘅原因。」
連同今季落鑊嘅林柏特，車路士喺油王時代已經炒過10位領隊，為球隊贏得雙冠嘅安察洛堤、幫車路士捧走首個歐聯冠軍嘅迪馬堤奧、兩度掌帥嘅摩連奴統統難逃被炒命運，不過阿巴莫域治認為呢樣唔係問題：「我認為咁係務實嘅做法，我哋樂於喺正確嘅時間作出正確嘅改變，確保我哋能夠達成長遠嘅理想。」
