百億富三代媾女唔捨得使錢 鍾培生性慾強冇拖拍 又怕一夜情被唱

百億富三代媾女唔捨得使錢 
鍾培生性慾強冇拖拍 又怕一夜情被唱

【娛樂人物】被稱為「百億富三代」的鍾培生,因挑戰林作上擂台打「林鍾一戰」,引起全城熱話,讓不少花生友關注他的家底與感情生活。日前鍾培生在淺水灣萬呎豪宅接受《蘋果》專訪,曾自爆性慾強的他坦言仍是單身,但卻怕一夜情被周圍唱,又爆自己曾肉痛用五位數字買化妝品給女伴,之後見到心愛的模型玩具也不捨得買。

撰文:嵐山

■鍾培生日前在淺水灣萬呎豪宅受訪,自爆現在單身,最怕玩一夜情被唱。

鍾培生含住金鎖匙出世,祖父是「工廈大王」鍾江海,他為人超級有自信,惟獨面對愛情,卻有點手足無措。鍾培生曾被傳媒封為「純情小鴨鴨」,24歲才初戀,至今30歲共拍過五次拖,最長兩年,最快一個月分手。日前他接受《蘋果》專訪,問到現在有沒有拍拖?他尷尬笑說:「單身呀!影到再解釋啦,哈哈哈。」

■現時鍾培生每日早上7時半已起床練體能,為對戰林作做好準備。

■去年鍾培生邀請陳嘉倩上自家網上節目,更揚言包紅館給對方報天氣。互聯網圖片

■三年前鍾培生在節目中被田蕊妮睇死冇拖拍。互聯網圖片

要尊重未來太太

提到三年前上節目《女人四十》,被speed dating對象田蕊妮睇死「搵唔到女朋友」,鍾培生至今仍帶點不忿說:「嗰次我係幫朋友,叫我上節目玩吓,藝人揀我哋,但個態度係惡劣嘅,佢一開始人身攻擊,嗰啲嘢俾人cut晒,始終係人哋節目,應承咗就做。我又唔係好care人講乜,乜叫追唔到女仔啫。」節目上,他自爆性慾強:「我男性荷爾蒙係過多,今朝7點剃完鬚,𠵱家已經有鬚根,生得勁快。」他笑言性慾強不會影響人:「唔會關好多人事,好寶貴。」談到一夜情,他自認沒有膽量:「我肉體唔介意,但精神上係介意,實際上都介意。你睇我記者會,我係一個好高傲氣嘅人,我會驚one night stand完會唔會俾人周圍唱,話你食過鍾培生,或者話我周圍食女。唔關家族名聲事,但都要尊重我未來老婆,我走去識啲本身唔潔身自愛嘅女仔,人哋大家閨秀點見人。」

撇開祖蔭,鍾培生靠一雙手創立電競公司,賬面身家有三億,但何解未有女朋友?鍾培生想了又想說:「通常一拍即合,如果對方一開始睇唔到我嘅優點,我做乜要作賤自己?」他自覺最大賣點不是有錢,而是勤力,「大把人有錢過我,我覺得勤力唔多人有。」最大缺點似乎是難相處,他笑着說:「正正常常,有手有腳、有事業,點解喺感情上咁多問題,咁梗係我有問題啦,唔通全世界啲女有事咩,咁梗係我有病啦,我梗係知啦!我成日都檢討。」檢討完,個性依舊,他說:「唔諗住變,我對伴侶要求好高,基本樣靚身材正,年齡介乎25歲至35歲,唔好遲到、勤力,返工之外要自我增值,想生四至六個小朋友。我又唔鍾意人瞓十個鐘,瞓咁多覺做乜?」

■鍾培生曾因與陳婉衡露營拍節目而傳出緋聞。互聯網圖片

■直言肉赤花五位數買化妝品給女伴的鍾培生,卻包直升機與崔菲嫣飛去西貢拍節目。互聯網圖片

■鍾培生曾在節目中與簡淑兒「拍拖」遊大澳,表現興奮。互聯網圖片

萬元化妝品嗌貴

鍾培生自細對數字已經好敏感,十幾個月大、牙牙學語已跟媽媽攞簿仔數1至300,連對愛情亦以機會率計算:「我覺得使錢喺人身上係opportunity(機會),用喺自己身上係liability(責任)。有次去台灣,個女仔話唔記得帶化妝品,X你個肺,原來La Mer咁貴,諗住豪爽,望吓張單五位數,真係躁底;我第二日見到個gundam好靚,望咗十分鐘,女方問咁平你做乜唔買?我就係唔會買啲我唔需要嘅嘢,最後我哋都係普通朋友。」去年鍾培生邀請圈中女神上自家製網上節目,是否方便識靚女?他說:「疫情下想幫台前幕後都有份工,發掘吓香港好多地方原來咁靚。」鍾培生為冧前新聞主播陳嘉倩,豪言包紅館讓她報天氣,他說:「夢想同目標係唔同嘅,我冇承諾,係夢想幫佢開演唱會啫。」

■富二代生活離不開夜蒲,鍾培生反而愛玩模型,不時拍開箱片分享。

■鍾培生家住萬呎豪宅,花園更設有擂台自娛,並坦言未能想像住劏房之苦。