記錄反修例運動嘅《理大圍城》因為俾左派輿論圍攻，搞到高先電影院叫停兩場放映，發行商影意志話恐怕冇戲院再肯作商業放映。另一部由日本人製作，有關反修例運動嘅紀錄短片《香港画》，就成功喺日本全國至少13間戲院上映，海外版仲喺網上平台放映，香港人都睇到。
《香港画》由日本獨立影片製作人堀井威久麿製作，佢喺反送中運動期間來港拍攝，仲同參與抗爭嘅學生、主婦、長者等做訪問，主要記錄香港年輕人因乜原因走上街頭，參與製作者亦包括日本香港抗爭團隊Stand with Hong Kong at JPN成員。
呢部短片仲喺日本多個電影節獲獎，好似大阪門真國際電影節2020嘅「記錄片部門最優秀大獎」、札幌國際短片節嘅「記錄片部門最優秀大獎」、神戶INDEPENDENT電影節嘅「最高榮譽大獎」等。短片將於Vimeo平台供世界觀眾付費收看，收費8.5美元、約60蚊港紙，3月31日就會落架。
觀看網址：https://vimeo.com/ondemand/hongkongga
李八方