「無你們的參與，唔會成事。」估吓，邊個咁講？
疫苗打極唔夾條數，距離林鄭五成人口打咗就可以放寬檢疫措施，好很遠。立功心切的聶局長與哽咽焗打國貨的陳局長賴地硬。打晒科興，討好北京，高官搵命搏，谷高針數，唔成事係因為無你們參與囉。大數據睇晒，19萬公僕尤其是紀律部隊，以為宣咗誓過海就神仙，別癡心妄想了。針冇兩頭利，打兩針貼地。坐享薪高糧準，延遲退休兼翻閹是有代價的，忠誠廢物竟然冇配合去盡，還得了？
唔成事，喔，原來是法官判詞。對象是14歲女學生。一句唔成事，後果很可能是「栗戰司」（緊跟栗戰書，香港無三權分立但識得自動改名）狠狠上訴，監牢之門，殘酷為少女大開。法官就算離地七丈都知道，2019自由之夏「無香港人參與，唔會成事」。兩年後今天，N份西環黨報未審先斬，無論成唔成事，有無參與，都會一頸血。
流血不止的香港人，何以有信念打科興？三藩市75歲老嫗當街被白人男子無端端一拳「焚」過來，負傷還拖以木棍回擊。白人頭破血流，老嫗悲憤控訴「個仆街蝦我！」香港人不禁動容，打呢棍反擊PK們！真真打得好！