RubberBand成員都是70、80後，都曾在80年代尾經歷過親友或同學移民外地，6號說：「嗰時能力好嘅朋友去澳紐美加移民，能力唔好就喺啟德機場講再見，估唔到𠵱家再諗呢啲問題。」6號覺得自2019年以來，移民已成為香港這代人的命題，他與太太不斷跟朋友們食farewell飯，其中不少人都很倉卒計劃移居英國。
提到現時香港創作環境比以前更困難，6號直言：「唔諗咁多啦，我哋講身邊故事、呢個城市嘅故事、通過講故事去將自己想講嘅話擺喺裏面。」泥鯭亦有同感：「創作最可愛嘅嘢，往往可以喺文字、畫面上面，好婉轉去表達。無論你點樣打壓都好，總有一個空間可以將你嘅思想傳遞出去。」