第一季疫情反覆，或會影響短期運動服飾銷售，但古天后對潛在銷售復蘇仍抱正面態度，相信相關公司已通過更強嘅渠道戰略做好準備及積極控制庫存。隨着運動參與度提高、政府政策支持及體育用品公司喺產品、品牌及渠道嘅策略提升，相信長期結構性增長維持不變。
眾多體品股中，申洲國際（2313）訂單前景表現強勁，市場普遍對其增長前景甚具信心，故願意付出估值溢價。申洲喺去年爆發疫情期間，仍錄得穩定增長，其OEM模式反應較快，有助公司捕捉品牌轉向直接向消費者銷售嘅機遇。雖然申洲去年下半年受歐美疫情、美元弱勢及平均銷售單價較低所影響，不過展望將來，估計今年將有強勁反彈，因為渠道庫存水平維持健康，預期2020年至2022年公司銷售增長可維持雙位數。
申洲去年12月股權架構曾成出變動，今年1月曾有主要股東配股嘅滔搏（6110），亦係大行睇好嘅體品股。NIKE及adidas今年1至2月份喺中國銷售及息稅前利潤率高於預期，預料滔搏2021年下半年度（去年10月至今年2月）純利按年升60%，而全年度計純利料升15%，較市場平均預測高9%。
隨着adidas五年戰略計劃的實施，adidas將在今明兩年縮窄與NIKE喺中國增長差距，對滔搏有結構性正面影響。集團亦受惠全球體育服飾品牌喺中國嘅市佔率增長，強勁嘅經營效率亦令集團更具競爭優勢。滔搏現價仍未反映集團數碼化及微信生態系統嘅潛在轉型價值，預期滔搏營業收入及利潤率將改善，唔少大行均睇好其前景，建議買入。
古天后