擰歪面唔睇新聞畫面但仍聽到張小明說乜乜乜……就快跌入淺層睡魔懷抱之際忽然聽到他這麼說：「不能天馬行空，這是人大311的決定。」311？日本東北大地震十周年剛過，張小明有心攞景。中日有牙齒痕但在鄰居傷口上灑鹽，以為有錢就能任性？311大地震舉世震動，人大決定咁神聖，張小明竟然比作大災大難？唔尋常。
311人大決定，將香港拖落永不超生的無底洞。張小明唔會無端端扮數字控，311肯定唔係貪口爽。雖然沒有窒習翠翠的膽，但乘機暗批鄭市長搞到香港一鑊粥兼粥中撒落七粒屎。311喪鐘響起，人大捲起海嘯巨浪，香港這個埠仔池塘沒頂，從政者老中青一網打沉。張小明唔係得閒得滯表演滾水煮蛙，而係超越印度神童，發出福島核事故警示！海嘯無眼，以為得米的乜聯會乜賤聯等住同歸於盡！
小明神算到一個地步，就係人一離開大陸南下香港，北京各省市即遭至強沙塵暴侵襲。小明車公上身，能知火未燃，最緊要人平安嘛！今日仍唔知應否打科興的市民，全家連外傭預約接種前，忠誠升級虔誠，跪求指點吓啦，張大仙。