八方呢排落街見到撐乜撐物街站，又再感受到維穩費南下、愛國事業又復工喇。但藍絲一向缺橋，除咗擺街站又有乜噱頭？一班「藍絲KOL」見黃店巡禮搞得咁成功，噚日有樣學樣整咗個「Shop2049」支持藍店活動，參加店舖仲由四間「大幅」升到五間！
活動由頭到腳得啖笑，愛國係偉大事業，得五間參與都不特止，仲叫自己「正常人商戶」，難怪有網友反問，「邊有正常人話自己係正常人㗎？」。活動時間只係夜晚六點到九點，十足十藍絲收錢先愛國嘅作風，其餘時間就唔使支持藍店。直播一出街，八方留意到好多留言話「好想食好想食」，淨係想食，身體就最誠實，怪唔得咁多藍店執笠囉。
講返2049活動，其中一個搞手「西門梓敬」就喺fb直播食飯，開場介紹五間藍店時，居然口窒窒差啲唔記得，氣氛相當老尷。同枱食飯一共有四人，包括經常被質疑有美國籍嘅高志森，一枱四人全程無罩，就連藍店東主都冇戴口罩。連埋揸機拍攝嗰位，保守估計六個人同枱飯敍。不過犯法就係犯法，有啲人就永遠都唔會收到599G嘅。
李八方