N年前踢過水晶宮嘅前國足隊長范志毅，繼前排聲稱自己曾經為咗踢亞洲盃而拒絕加盟利物浦後，日前又喺內地一個電視節目，係咁批評中國男籃近年嘅表現，同場嘅中國男籃主力周琦同郭艾倫齊齊「中槍」。「荷蘭叻」上身嘅「范大將軍」，又挖番2019年郭艾倫喺籃球世界盃生死戰只係攞到1分單嘢嚟笑，結果就連新華社都睇唔過眼，叫佢哋唔好狗咬狗骨。
手機用戶請按此放大圖表
范志毅喺日前出街嘅一集《吐槽大會》做嘉賓，節目一開始佢就發炮，話唔明中國男籃究竟要差到乜嘢程度，製作單位先會搵佢呢個足球名宿，去鬧醒周琦同郭艾倫呢班現役國手。越鬧越興奮嘅范大將軍，又攞咗2019年中國喺籃球世界盃第2場分組賽輸畀波蘭場波嚟講，佢話嗰陣睇到第4節得番7秒，東道主嘅中國仲領先緊幾分，於是就去咗廁所，點知返嚟就見到波蘭追和咗，加時後中國仲輸埋，佢仲話當時其實應調周琦出場去廁所先啱。
范志毅又將炮口對準號稱「亞洲第一後衞」嘅郭艾倫，笑對方喺世界盃生死戰只係攞到一分。范大將軍話自己都係後衞，但喺足球場跑7、80米後入波都仲得，郭艾倫打籃球都只係攞到一分，真係唔容易咁話。范志毅喺節目後半段繼續寸爆中國男籃，話佢哋上至教練下至球員都成日喺綜藝節目亮相，又反問「點解節目組唔搵中國女排？係因為女排要練波，備戰奧運冇時間」，狂踩中國男籃個個以為自己係大明星，但其實連本份都未做好！
節目出街後引起好大迴響，但當然亦有人認為，范志毅同覺得「拜恩進攻咁勁唔應該打後衞」嘅荷蘭叻一樣，乜都唔識就亂咁噏扮代表，完全可以不理。不過，郭艾倫話晒都係前中國男籃主力控衞郭士強嘅姪仔，仲要係歷來第一個同「飛人牌」簽約嘅亞洲球員，家陣真係幾冇面。
新華社星期一就出咗篇評論文章，打圓場又好維穩又好，話節目刻意煽動國足同國籃互踩，只係為咗提高收視，純粹出於商業考慮，但其實雙方唔應該「菜雞互啄」，即係我哋講開嘅唔好五十步笑百步同狗咬狗骨。評論又話，周琦同郭艾倫亦要認真反省范大將軍嘅批評，唔好就咁以笑遮醜，輕輕帶過就當冇咗件事。
