美斯周一追平沙維代表巴塞隆拿上陣嘅767場隊史紀錄，兼且梅開二度，協助球隊主場4:1大勝榜尾侯爾斯卡，喺西甲17輪不敗，超越皇家馬德里升上聯賽榜第二位，落後榜首馬德里體育會四分。巴塞會方喺看台展示美斯同沙維互搭膊頭兼手指向天嘅背面畫像慶祝美斯平紀錄，呢位球王喺13分鐘遠射入網，助巴塞領先1:0，今季西甲入球累積到20球，成為西甲史上首位連續13季至少射入20球嘅球員。35分鐘，基沙文接應柏迪助攻後遠射得手，巴塞領前到2:0。到上半場補時，拉菲爾美亞博到12碼，佢親自操刀為侯爾斯卡追成1:2。換邊後踢到53分鐘，美斯左路傳中，21歲小將奧斯卡文古沙頭槌破網，頂入巴塞1隊生涯第1球，助巴塞領前到3:1。美斯喺90分鐘遠射埋齋，助巴塞大勝4:1。但美斯日前就好勞氣，事關佢話次次練完波揸車出閘都係咁俾球迷圍住影相，佢認得出部份人成日喺度影，就忍唔住鬧：「你哋日日嚟影做咩啫？你哋成日喺度正常咩？唔好咁啦！」見到球王發脾氣，班球迷都驚驚即刻道歉。