葉巧琳和陳葦璇去年參加ViuTV的《全民造星III》，令人氣及知名度三級跳，兩人直言參加《造星III》後，至少找到方向和目標，Mischa感恩有這個機會演出：「呢個比賽令我哋不停有機會表演，我哋係好幸福。」她認為最重要是找回初心，從前誤打誤撞走進娛樂圈，有無形的框框限制自己：「原來個舞台可以做咁多嘢，可以天花龍鳳都得，點解我哋表演者成日要迎合外間嘅規限呢？」
Mischa透露去年是她遇到的第二個迷惘期：「2020年由疫症開始喺度等，唔知等乜嘢，個人迷迷糊糊咁，冇job又冇收入，直到參加《造星III》先守得雲開見月明。」陳葦璇自嘲她的迷惘期既多亦密集，原本獨自到台灣，邀得當地的音樂人合製四首歌，後來她的簽證到期加上疫情，被迫「滯留」香港：「但最開心係喺呢個過程搵得返自己想做乜，或者試多咗唔同嘢，無論啱唔啱自己都好。」陳葦璇指以前派歌時都是正經地宣傳，卻從未像《造星III》為每首歌加入不同元素，令她大開眼界。