祖雲達斯自從上星期歐聯16強出局後，葡萄牙球星基斯坦奴朗拿度（C朗）就一直受外界批評，仲有傳祖記要賣走佢㖭！禮拜日C朗就代表祖記作客卡利亞里，先喺10分鐘以頭槌建功，25分鐘用右腳入12碼，32分鐘再用左腳入波，踢咗半粒鐘多啲上演咗一幕「完美戴帽」，最終帶領祖記贏3:1，以行動回應外界嘅質疑。賽後C朗仲發帖話自己今日射入咗第770球，正式超越巴西球王比利嘅職業生涯767球嘅紀錄，佢話今次已經係計埋比利喺省隊同軍隊嘅入波，搞到比利都冇得話唔好，發帖恭喜C朗。
雖然祖記今場全取三分，不過榜首嘅國際米蘭憑盧卡古同拿達路馬天尼斯各入一球，作客2:1擊敗拖連奴，所以祖記仲落後畀國際10分但踢少1場，不過已經追到同第2位嘅AC米蘭只差1分，因為近期好多傷兵嘅米蘭，禮拜日喺主場以0:1輸咗畀拿玻里，家陣隨時有機會畀祖記過頭。