北京正式「完結」香港選舉制度，過去呢個星期喺香港多處街頭見到唔少「忠誠的廢物」收集簽名，話要撐全國人大決定喎，仲有唔少777班子高官現身支持，堂堂中華人民共和國最高國家權力機關做決定要呢班人撐？不過，人大今次閹割香港選舉乜唔係得到廣泛支持咩？好似上星期五，有班藍絲醫生喺親中報章登廣告，話要「完善制度再上路」，當中有唔少熟口熟面嘅名，好似李國章、高永文、潘佩璆、林哲玄、周伯展等等，但有網民發現只得百二人多啲，仲少過上次藍絲醫生登撐警廣告。
「No Stake醫學生」fb專頁數過名單，竟然只得百二人多啲，仲話雖然字體已經放到好大，但都填唔滿全版廣告，於是就「聰明」地諗到可以加埋「暨南大學同學會」、「中山醫科大學校友會」、「政府軍部醫院華員職工會」入去填位。「No Stake醫學生」話2019年嘅撐警聯署有500位醫生，反問「唔知點解今次聯署少咁多人？好失望，點解大家愛國嘅熱誠咁唔堅定」，而前線科技人員都關注呢份藍絲醫生廣告，話香港有成萬幾個醫生，但「得百幾個愛國」，仲話唔怪之要引入非本地醫生。
李八方