J.Arie早前跟邵氏簽下的合約並非包薪，而是一年一騷，她工作年半拍兩劇，結算出糧只得四位數字。現今疫情下演藝工作驟減，問到J.Arie這段日子是否靠食老本？她衝口而出：「老本？首先我從來都冇老本，入行八年都未試過包薪。」她直認每月量入為出，被迫做「月光族」：「呢刻銀行戶口積蓄有五位頭，算入行以嚟最多錢。我學識唔能夠靠等，要自己製造機會。」
音樂發燒友J.Arie為追夢不惜一切，她最大開支是做歌：「我只會搵一位攝影師拍MV，其他production、剪片、監製同宣傳自己做晒，但慳極做一首歌至少都要八萬蚊，我𠵱家係鋪鋪清，儲夠錢就出一隻。我見過有歌手成日hashtag一句『貼錢返工食樹皮』，呢句都係我心底話。」J.Arie不至於食樹皮，但都節衣縮食：「有時全日食個菠蘿油加杯熱奶茶，21蚊搞掂，其餘時間飲吓水，食吓梳打餅。」