港台節目《鏗鏘說》前晚播出新一集「登『峯』造極」，由蘇玉華訪問導演杜琪峯（杜Sir）。杜Sir揞名提到早前蕭若元說「香港電影已死」，杜Sir批評對方不懂電影︰「佢只黐住電影搵食，做電影嘅年輕人千祈唔好聽，呢句係廢話。佢自己冇得撈，以為人哋都冇得撈。」雖然他表示不擔心創作自由收窄，但也坦言有無形界線，「仲會一鋪比一鋪更大挑戰」。
杜Sir形容自己是「橡皮蝨乸」，撳極唔死︰「我哋係做創作、做電影唔需要挑戰任何嘢。我鼓勵小朋友一定要做落去，你唔做即係你投降。」談到香港近兩年變化，年輕人感到絕望，杜Sir表示理解這種感覺：「大部份香港人都理解，唔只係我，喺呢個時代中，更加考驗我哋嘅韌力。喺影圈年輕一代，你哋有時間同年輕嘅衝動，可以做時代賦予嘅任務。」節目中，杜Sir被要求要選楊明或王喜翻拍《PTU》，他即說不認識楊明，還表示：「我冇睇無綫20年。」杜Sir最後選擇2004年上映的《柔道龍虎榜》送給香港人：「我覺得嗰時真係同𠵱家差唔多，絕望到不得了，我覺得呢刻遇到嘅問題係一定會過去。柔道最重要係企返起身，撻咗落去起返身咪得囉，不停咁去戰鬥。」