祖雲達斯同巴塞隆拿喺歐聯正式出局後，亦係2大球王基斯坦奴朗拿度（C朗）同美斯繼2005年後，一齊首次無緣歐聯八強。外界已傳出祖記嚟緊夏天會出售年薪達3,100萬歐元、仲有1年合約嘅C朗，以免出年人財兩失；至於今夏同巴塞合約到期嘅美斯，到𠵱家就未有續約消息，有傳水頭充足嘅法甲豪門巴黎聖日耳門（PSG），亦打算如果今夏留唔住「準球王」基利安麥巴比，就會簽入C朗或美斯其中一人頂替。PSG體育總監李安納度就承認對簽下最好嘅球員持開放態度：「我哋一直願意同所有最好嘅球員展開談判，即管睇吓邊個想加盟，但呢一刻我哋冇進行任何談判。」